【香港】西灣河 | 太安樓掃街 - 穿山過海都要去既平民美食夜市

【VLOG】

大家好！我係好鍾意去旅行既艾文！

香港西灣河景點 - 太安樓

今次黎到太安樓，我地分別去左魚旦佬、太安樓牛雜、八一蛋包の料理、小老板 。

香港西灣河太安樓美食 - 魚旦佬

宜加下晝5點幾，魚旦佬已經有成20人排隊，排隊時仲不停有人喺後面跟隊，4~50人真係閒閒地。

排左15分鐘左右就到艾文和旅伴，我地揀左魚旦(HK$7)、齋(HK$7)、牛丸(HK$11)。

佢既秘製沙嗲汁真係超惹味！魚旦彈牙，沙嗲汁好味！

齋就入面仲有好多水，唔係好吸到汁。

牛丸彈牙而且牛味十足，唔係平價丸，而且解凍得好，冇雪味，好味！

總括黎講，好味，價錢亦算實惠，個汁直情想撈啖麵食埋佢。不過就略嫌要排隊等太耐，如果可以幸運地喺未係咁多人時幫襯就最好啦！

香港西灣河太安樓美食 - 太安樓牛雜

同魚旦佬隔五個舖位就見到呢一條人龍，就係排緊太安樓牛雜！

平時艾文冇點食牛雜，喺旅伴既堅持下，我地揀左牛肚、牛筋、蝴蝶腩 (每樣HK$12，總共HK$36)。

牛肚平時艾文冇點食，唔係好識比較。食落煙煙韌韌，好咬口味道唔錯。

牛筋忟到好淋，又唔會好似啫哩咁，比平時咖哩牛腩入面食到既牛筋好味，唔錯！

蝴蝶腩係豬肉黎，由於原材料形狀似蝴蝶，所以叫蝴蝶腩，係連接豬肺葉同豬肚既部位，食落比牛腩鬆軟啲，但又有啲筋膜好咬口，好味!

香港西灣河太安樓美食 - 八一蛋包の料理

之後經過八一蛋包の料理，聽到有人叫鰻魚炒飯，平時艾文都好鍾意食鰻魚飯，就叫左一個試下。

等左約10分鐘就有得食，食落味道偏淡，鰻魚肉都有唔少，HK$48算係抵食，飯炒得相當香，鰻魚粒又唔會太乾身。而味道就正正常常，又唔算出色，但係都會想試下佢地既招牌豬頸肉蛋包飯。

香港西灣河太安樓美食 - 八一蛋包の料理

黎太安樓之前有睇過介紹，話小老板既生煎包好好味，但行左幾個圈都見唔到小老板既舖位，上網Google一番先知，原來舖位喺外圍，喺西灣河街巿對面。

艾文和旅伴叫左三樣野，豆漿、生煎鍋貼、生煎包，全部都又抵又好味！

豆漿HK$6一支，豆味香濃！

生煎鍋貼HK$12/3隻，個底煎到脆，好香口！

生煎包都係HK$12/3個，外脆內軟，咬開裡面仲有啖啖肉汁！

食到呢度艾文和旅伴已經食飽了。

 

【VLOG】

艾文愛旅行 | 各大小行程總覽

艾文愛旅行